សម្តេចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា បានអញ្ជើញដឹកនាំគណៈប្រតិភូគគណបក្សប្រជាជនកម្ពុជា គោរពវិញ្ញាណក្ខន្ធសព ឯកឧត្តម ខាំតៃ ស៊ីផាន់ដន អតីតនាយករដ្ឋមន្ត្រី និងប្រធានរដ្ឋ នៃសាធារណរដ្ឋប្រជាធិបតេយ្យប្រជាមានិតឡាវ និងជាអតីតប្រធានគណៈកម្មាធិការមជ្ឈិមនៃបក្សបដិវត្តន៍ឡាវ នៅស្ថានទូតសាធារណរដ្ឋប្រជាធិបតេយ្យប្រជាមានិតឡាវ ប្រចាំព្រះរាជាណាចក្រកម្ពុជា នាព្រឹកថ្ងៃសុក្រ ៧កើត ខែចេត្រ ឆ្នាំរោង ឆស័ក ព.ស. ២៥៦៨ ត្រូវនឹង ថ្ងៃទី៤ ខែមេសា ឆ្នាំ២០២៥។
មរណភាព ឯកឧត្តម ខាំតៃ ស៊ីផាន់ដន គឺជាការបាត់នូវបីតាជាទីគោរពស្រលាញ់បំផុត ហើយសម្រាប់ប្រជាជាតិឡាវទាំងមូល គឺជាការបាត់បង់នូវឥស្សរជននយោបាយ និងរដ្ឋបុរសដ៏ឆ្នើមបំផុតមួយរូបក្នុងប្រវត្តិសាស្ត្រ នៃសាធារណដ្ឋប្រជាធិបតេយ្យប្រជាមានិតឡាវ ហើយការរួមចំណែករបស់ ឯកឧត្តម បានដឹកនាំប្រទេសជាតិឱ្យមានវិបុលភាព។
ឯកឧត្តម ខាំតៃ ស៊ីផាន់ដន នឹងស្ថិតនៅក្នុងការចងចាំជានិច្ច ក្នុងនាមជាមិត្ត និងដៃគូដ៏ឧត្តុង្គឧត្តមរបស់កម្ពុជា និងប្រជាជនកម្ពុជា ក៏ដូចជាស្ថាបនិកគន្លឹះមួយរូប នៅក្នុងការកសាងនូវចំណងមិត្តភាព និងភាព ដៃគូដ៏យូរអង្វែងរវាងប្រជាជាតិនិងបក្សយើងទាំងពីរ។
នៅក្នុងសមានទុក្ខដ៏ក្រៀមក្រំនេះ សម្តេចអគ្គមហាពញាចក្រី ហេង សំរិន បានចូលរួមរំលែកទុក្ខយ៉ាងក្រៀមក្រំបំផុត និងសេចក្តីអាណិត អាសូរយ៉ាងជ្រាលជ្រៅជូនចំពោះក្រុមគ្រួសារ ក៏ដូចជាប្រជាជនឡាវ និងបក្សប្រជាជនបដិវត្តន៍ឡាវ ចំពោះការបាត់បង់ដ៏ធំធេងនេះ។
សម្តេចអគ្គមហាពញាចក្រី ហេង សំរិន បានឧទ្ទិសបួងសួងដល់ដួងវិញ្ញាណក្ខន្ធ ឯកឧត្តម ខាំតៃ ស៊ីផាន់ដន បានទៅកាន់ សុគតិភពកុំបីឃ្លៀងឃ្លាតឡើយ៕ អរគុណសន្ដិភាព
