ទីស្តីការក្រសួងយុត្តិធម៌៖ នៅព្រឹកថ្ងៃអង្គារ ៤កើត ខែចេត្រ ឆ្នាំរោង ឆស័ក ព.ស. ២៥៦៨ ត្រូវនឹងថ្ងៃទី១ ខែមេសា ឆ្នាំ២០២៥ នេះ, ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្ត្រីក្រសួងយុត្តិធម៌ បានអញ្ជើញដឹកនាំកិច្ចប្រជុំកម្រិតថ្នាក់ដឹកនាំក្រសួងយុត្តិធម៌ ដើម្បីពិនិត្យ និងពិភាក្សាលើការវិភាគមុខងារ និងផែនការធនធានមនុស្សរបស់ក្រសួងយុត្តិធម៌។
កិច្ចប្រជុំនេះ ត្រូវបានរៀបចំឡើង ដើម្បីអនុញ្ញាតឱ្យក្រុមការងាររៀបចំផែនការធនធានមនុស្សក្នុងវិស័យយុត្តិធម៌ធ្វើបទបង្ហាញ អំពីលទ្ធផលនៃការវិភាគមុខងារ និងសេចក្តីព្រាងផែនការធនធានមនុស្សរបស់ក្រសួងយុត្តិធម៌ ក្នុងគោលបំណងពង្រឹង និងលើកកម្ពស់ប្រសិទ្ធភាព គុណភាព និងប្រសិទ្ធផល ក្នុងការបំពេញមុខងាររបស់អង្គភាពនានាក្រោមឱវាទក្រសួងយុត្តិធម៌ ដោយផ្តោតការយកចិត្តទុកដាក់លើការអនុវត្តចង្កោមសកម្មភាពចំនួន ៣ រួមមាន៖ (១)- ការពិនិត្យឡើងវិញ និងការវិភាគមុខងារ និងរចនាសម្ព័ន្ធរបស់អង្គភាពចំនួន ១១ នៅក្រោមឱវាទរបស់ក្រសួងយុត្តិធម៌, (២)- ការវិភាគពីតម្រូវការធនធានមនុស្ស និងពង្រាយធនធានមនុស្សរបស់អង្គភាព និង (៣)- ការអភិវឌ្ឍន៍សមត្ថភាពធនធានមនុស្សរបស់អង្គភាព។
ថ្លែងក្នុងកិច្ចប្រជុំនេះ, ឯកឧត្តមឧបនាយករដ្ឋមន្ត្រី បានផ្តល់នូវអនុសាសន៍ណែនាំសំខាន់ៗមួយចំនួនដល់ ក្រុមការងាររៀបចំផែនការធនធានមនុស្សក្នុងវិស័យយុត្តិធម៌ ឱ្យយកចិត្តទុកដាក់ពិនិត្យលើការងារនេះ ដើម្បីឆ្លើយតបទៅនឹងវិធានការគន្លឹះទី១ របស់ សម្ដេចធិបតីនាយករដ្ឋមន្ត្រី ក្នុងការកែទម្រង់រដ្ឋបាលសាធារណៈ ដោយឈរលើអភិក្រម “រៀបចំផ្ទះឱ្យបានរៀបរយ” និង “ពង្រឹងជាជាងពង្រីក” ដោយផ្តោតជាពិសេសលើអភិបាលកិច្ច និងការធ្វើទំនើបកម្មស្ថាប័នរដ្ឋឱ្យក្លាយជារដ្ឋបាលសាធារណៈទំនើប ប្រកបដោយសមត្ថភាពខ្ពស់ ខ្លាំង វៃឆ្លាត និងស្អាតស្អំ។ បន្ថែមពីនេះ, ឯកឧត្តមឧបនាយករដ្ឋមន្ត្រី ក៏បានផ្ដល់អនុសាសន៍ដឹកនាំមួយចំនួនដល់ក្រុមការងារ ដើម្បីជាការតម្រង់ទិស និងដើម្បីជំរុញឱ្យការងារនេះទទួលបានលទ្ធផលតាមការរំពឹងទុក៕
អរគុណសន្ដិភាព
