ខេត្តស្វាយរៀង៖ ពិតជាសាហាវឃោរឃៅមែន បុគ្គលិកក្រុមហ៊ុនសាងសង់ផ្លូវ បានផ្ទុះជម្លោះក្នុងវង់ផឹកស៊ីជាមួយគ្នា ហើយធ្វើឲ្យតៃកុងបើកអេស្កាវ៉ាក់ទ័រ ម្នាក់ខឹងចងគំនុំ ទៅបើកអេស្កាវ៉ាក់ទ័រ រុញផ្ទះបំបាក់រលំសង្កត់ស្លាប់ម្នាក់ របួសធ្ងន់ម្នាក់ ធ្វើឲ្យប្រជាពលរដ្ឋមានការភ្ញាក់ផ្អើលយ៉ាងខ្លាំង នាំគ្នាទៅគាស់យកជនរងគ្រោះ ហើយប្តឹងសមត្ថកិច្ចឲ្យចាប់ខ្លួនជនបង្កបានភ្លាមៗ ផងដែរ ។
ករណីនេះបានកើតឡើងនៅវេលាម៉ោង០៦និង៥នាទីល្ងាចថ្ងៃទី២៩ ខែកក្កដា ឆ្នាំ២០២៤ នៅចំណុចផ្ទះ១០០ខ្នង (ដែលរាជរដ្ឋាភិបាលសាងសង់ផ្តល់ជូនអតីតៈយុទ្ធជនសោធននិវត្ត) នៅជិតព្រំដែន ក្បែរប៉ុស្តិ៍ច្រករបៀងធ្លកថ្មី ស្ថិតនៅភូមិធ្លកថ្មី ឃុំត្នោត ស្រុកកំពង់រោទិ៍ ខេត្តស្វាយរៀង ។
បើតាមសមត្ថកិច្ចបានឲ្យកោះសន្តិភាពដឹងថា ជនរងគ្រោះ ដែលស្លា.ប់បាត់បង់ជីវិត មានឈ្មោះ ឌឹម សារឿន ភេទប្រុស អាយុ៣៨ឆ្នាំ មានកូន០២នាក់ (ស្រីម្នាក់) ជាបុគ្គលិកបើកអាប៊ុលកិនថ្នល់(ក្រុមហ៊ុនសាងសង់ផ្លូវ) មានទីលំនៅភូមិតានប់ ឃុំត្នោត ស្រុកបាទីខេត្តតាកែវត្រូវផ្ទះបាក់សង្កត់ចំពីលើស្លា.ប់បាត់បង់ជីវិតគួរឲ្យសង្វេក ។
ជនរងគ្រោះទី២ មានឈ្មោះតាំង យូ ភេទប្រុស អាយុ៣៤ឆ្នាំ មានទីលំនៅ ភូមិតាជោ សង្កាត់ស្វាយតឿ ក្រុងស្វាយរៀង របួសក្បាលធ្ងន់ធ្ងរ ត្រូវសមត្ថកិច្ចហៅរថយន្តដឹកបញ្ជូនមកមន្ទីរពេទ្យខេត្តស្វាយរៀង ដើម្បីសង្គ្រោះ
រីឯជនបង្ក ឈ្មោះ ខែក បញ្ញា ភេទប្រុស អាយ២៥ឆ្នាំ មានទីលំនៅភូមិគាស់ក្រឡ ស្រុកគាស់ក្រឡ ខេត្តបាត់ដំបង ត្រូវសមត្ថកិច្ចចាប់ខ្លួនបានភ្លាមៗ រួចបញ្ជូនមកស្នងការនគបាលខេត្តស្វាយរៀង ចាត់ការតាមនីតិវិធី ។
សមត្ថកិច្ចបានបន្តថា បើតាមបុគ្គលិកកម្មករក្រុមហ៊ុនធ្វើថ្នល់ បានប្រាប់ថា មុនពេលកើតហេតុ ជនបង្ក និងជនរងគ្រោះ បានផឹកស៊ីជាមួយគ្នា ក្រោយមក ក៏មានការឈ្លោះប្រកែកគ្នាយ៉ាងខ្លាំង ក៏ត្រូវមិត្តភក្តិធ្វើការជាមួយគ្នា ឃាត់ជនបង្ក ក៏បានដើរចេញទៅ ចំណែកជនរងគ្រោះ បានផឹកបន្ត រហូតដល់ស្រវឹងជោក ក៏នាំគ្នាទៅចងអង្រឹងដេក នៅក្រោមផ្ទះ ដែលម្ចាស់គេអត់នៅ (ផ្ទះមន្ត្រីនគបាលចូលនិវត្តម្នាក់) ក្រោយពីដេកលង់លក់មួយសន្ទុះ ក្រោយមក ស្រាប់តែជនបង្ក បើកអេស្កាវ៉ាក់ទ័រ ១គ្រឿង មកកាយរុញបំបាក់ផ្ទះ បណ្តាលឲ្យបាក់ផ្ទះខ្ទេចទាំងស្រុង សង្កត់ពីលើជនរងគ្រោះទាំង០២នាក់ ដែលកំពុងដេកលង់លក់ក្រោមផ្ទះ ជាប់ពីលើ បង្កឲ្យមានការភ្ញាក់ផ្អើលយ៉ាងខ្លាំង ដល់កម្មករ និងប្រជាពលរដ្ឋនាំគ្នា មកមើល ហើយជួយគាស់យកជនរងគ្រោះ តែយឺតពេលទៅហើយ ជនរងគ្រោះម្នាក់ បានស្លា.ប់ហើយម្នាក់ទៀត រងរបួសធ្ងន់។
សមត្ថកិច្ចបានបញ្ជាក់ថា ភ្លាមៗនោះដែរ ប្រជាពលរដ្ឋបានប្តឹងសមត្ថកិច្ចនគបាលវរៈការពារព្រំដែន ប៉ុស្តិ៍ច្រករបៀងធ្លកថ្មី មកចាប់ខ្លួនជនសង្ស័យបានភ្លាមៗដែរ រួចបញ្ជូនឲ្យលោកអធិការ នៃអធិការដ្ឋាននគបាលស្រុកកំពង់រោទ៌ បញ្ជូនបន្តទៅស្នងការដ្ឋាននគបាលខេត្តស្វាយរៀង ទាំងយប់ ។
សមត្ថកិច្ចក៏បានហៅរថយន្តសាម៉ុយដឹកជនរងគ្រោះ ទៅមន្ទីរពេទ្យខេត្តស្វាយរៀង ដើម្បីសង្គ្រោះ ។ ចំណែកឯសពជនរងគ្រោះ ត្រូវបានសមត្ថកិច្ចប្រគល់ឲ្យក្រុមគ្រួសារ កាលពីវេលាម៉ោង១២និង១៥នាទីថ្ងៃត្រង់ ថ្ងៃទី៣០ ខែកក្កដានេះ ដើម្បីយកទៅធ្វើបុណ្យតាមប្រពៃណីនៅស្រុកកំណើតខេត្តតាកែវ ៕
ប្រភព កោះប៉ែន
.jpg)
.jpg)