ក្រសួងទេសចរណ៍ព្រមានជាលើកចុងក្រោយទៅលោក ហៀក សេងហួត ដែលមានរហ័សនាម «មគ្គុទ្ទេសក៍ក្រមា» ទាក់ទងនឹងការអធិប្បាយផ្សព្វផ្សាយតាមបណ្តាញសង្គមអំពីប្រវត្តិសាស្ត្រអបិយជំនឿដោយគ្មានមូលដ្ឋានច្បាស់លាស់ទៅកាន់ភ្ញៀវទេសចរ ធ្វើឱ្យប៉ះពាល់ដល់វប្បធម៌ និងសាសនារបស់កម្ពុជា។
ក្រសួងទេសចរណ៍ព្រមានថា ប្រសិននៅតែមិនគោរពតាមការព្រមាននេះ ក្រសួងនឹងព្យួរអាជ្ញាបណ្ណ ហើយអាចឈានដល់ការលុបអាជ្ញាបណ្ណមគ្គុទ្ទេសក៍ទេសចរណ៍ចោលតែម្តង។
ការព្រមាននេះធ្វើឡើងបន្ទាប់ពីមានមហាជនបានសម្តែងការមិនពេញចិត្តចំពោះលោកជាខ្លាំង ក្រោយពីមានវត្តមាននៅក្នុងវីដេអូរបស់ស្ត្រីលក់អនឡាញម្នាក់ដែលអះអាងថាមានបារមីសណ្ធឹតស្នងរូបនៅចាំថែរក្សាទឹកដីកម្ពុជាដែលធ្វើឱ្យអ្នកលេងបណ្តាញសង្គមរិះគន់ថាធ្វើឡើងដើម្បីចង់ល្បី និងបានស្នើឱ្យក្រសួង និងអាជ្ញាធរពាក់ព័ន្ធចាត់វិធានការលើស្ត្រីរូបនោះថែមទៀតផង។
មគ្គុទ្ទេសក៍ក្រមា បានទទួលលិខិតព្រមានមួយនេះ ហើយក៏បានចេញវីដេអូសុំទោសដែលលោកមួយរយៈនេះដែលបាននិយាយស្តីមានកំហុសខុសឆ្គងច្រើនដោយភ្លេចថាខ្លួនមានតួនាទីជាមគ្គុទ្ទេសក៍ទេសចរណ៍ដែលធ្វើឱ្យមហាជនមានការយល់ច្រឡំ។
លោកថ្លែងដូច្នេះថា៖ «ខ្ញុំសូមអធ្យាស្រ័យ និងសុំអភ័យទោសព្រះគុណម្ចាស់ ព្រះករុណា ព្រះពុទ្ធព្រះធម៌ព្រះសង្ឃ និងសូមឱ្យបងប្អូនខ្មែរទាំងក្នុងស្រុក និងក្រៅស្រុកអធ្យាស្រ័យអភ័យទោសដល់រូបខ្ញុំបាទ។ ខ្ញុំបាទ ហៀក សេងហូត មិនមានបំណងអាក្រក់ និងមិនហ៊ានធ្វើឱ្យខូចវប្បធម៌អីទេ»។
ក្រសួងទេសចរណ៍សង្ឃឹមថា មគ្គុទ្ទេសក៍ទេសចរណ៍ភាសាអង់គ្លេស លោក ហៀក សេងហួត នឹងកែប្រែរាល់សកម្មភាពឱ្យស្របតាមក្រមប្រតិបត្តិវិជ្ជាជីវៈ និងក្រមសីលធម៌វិជ្ជាជីវៈមគ្គុទ្ទេសក៍ទេសចរណ៍ក្នុងស្មារតីទទួលខុសត្រូវខ្ពស់ ដើម្បីលើក តម្លើងតម្លៃនៃវិជ្ជាជីវៈមគ្គុទ្ទេសក៍ទេសចរណ៍៕
